Мотор үйлдвэрлэгч, худалдаачдын нийгэмлэгээс боловсруулсан тоо үзүүлэнгээс харвал Их Британийн улсын автомашин үйлдвэрлэл өнгөрөгч онд сүүлийн 65 жилд үзэгдээгүй доод түвшинд хүрчээ. Нийгэмлэгээс мэдээлснээр энэхүү тоон үзүүлэлт нь үнэхээр харамсалтай бөгөөд автомашин үйлдвэрлэл энэ хэмжээнд хүртэл буурсан нь цар тахалтай ихээхэн холбоотой хэмээсэн байна.

Аз болоход автомашин үйлдвэрлэлийн салбарт 5 тэрбум фунтийн хөрөнгө оруулалт орж ирж байгаа нь ирээдүйг өөдрөгөөр харахад тус болох ч эрчим хүчний үнэ тасралтгүй өсөж байгаа явдал нь ойрын жилүүдэд тус салбарт бас нэгэн бэрхшээл болох гэнэ.

Тийнхүү тоон баримтаас харвал өнгөрөгч онд Их Британи улсад ердөө 860,000 автомашин үйлдвэрлэсэн байна. Энэ нь 2020 онтой харьцуулахад ч 6.7 хувиар буурсан үзүүлэлт бөгөөд цар тахлын өмнөх үетэй харьцуулбал даруй 34 хувиар бага юм.

Цар тахал автомашин үйлдвэрлэлд яагаад ийм том нөлөөтэй байгааг судалбал, коронавируст цар тахлын улмаас улс орнууд хилээ хааж, бараа таваар, бүтээгдэхүүний нийлүүлэлт зогссон нь автомашин бүтээхэд нэн шаардлагатай хагас дамжуулагчийн тээвэрлэлтэд ч нөлөөлсөн байна. Орчин цагт нэг автомашиныг бүтээхэд дор хаяж 1500-3000 хагас дамжуулагч ашигладаг юм. Тиймээс хагас дамжуулагчийн нийлүүлэлт зогсох нь үйлдвэрлэл тэр чигтээ зогссоноос ялгаагүй хэрэг ажээ.

Түүнчлэн цар тахлаас үүдэн үйлдвэрүүд ажилчдын хомсдолд орсон бөгөөд Их Британи улсын Свиндон мужид байрлах Хонда автомашины үйлдвэр л гэхэд хаалгаа барихад хүрсэн юм.

Эх сурвалж: BBC