Бямба гарагт Энэтхэг улс Хятадын Xiaomi корпорацын 725 сая ам.долларын хөрөнгийг хураан авчээ. Тодруулбал, Xiaomi корпорацын зүгээс тухайн шилжүүлгийг роялти төлбөр гэх нэрийн дор гадаадын аж ахуйн нэгжүүд рүү шилжүүлэх явцад Энэтхэгийн санхүүгийн гэмт хэрэгтэй тэмцэх агентлагаас “хууль бус гуйвуулга” хэмээн тогтоож, хөрөнгийг хураах шийдвэр гаргасан байна.
Харин хэргийг хэрхэн илрүүлсэн тухайд тэдний мэдэгдсэнээр, Энэтхэгийн санхүүгийн гэмт хэрэгтэй тэмцэх агентлаг Xiaomi корпорацыг гадаад валют гуйвуулгын хуулийг зөрчсөн байж болзошгүй хэрэгт сэжиглэн шалгаж байжээ.
Үйл явдлын хүрээнд Ройтерс агентлаг Xiaomi корпорацаас тодорхой тайлбар авахыг хүссэн ч тэд татгалзсан байна. Гэвч тэдний өмнө нь мэдэгдэж байснаар, мөрдөн шалгах ажиллагааны хүрээнд Xiaomi Энэтхэгийн санхүүгийн гэмт хэрэгтэй тэмцэх агентлагтай хамтран ажиллаж байгаа гэсэн юм.
Энэтхэг улсын зүгээс өнгөрөгч арван-хоёрдугаар сараас хойш Хятадын ухаалаг утас үйлдвэрлэгч нарыг татвараас зайлсхийсэн байж болзошгүй хэргийн хүрээнд ийнхүү шалгаж байгаа юм.
Эх сурвалж: Nikkei Asia