ОХУ-ын зүгээс орон нутгийн цагаар 25-ны өдөр мэдэгдэхдээ Украины үр тариа ачсан хөлөг онгоцнуудыг далайд гаргах “хүмүүнлэгийн коридор” үүсгэхэд бэлэн байгаагаа цохон тэмдэглээд энэ талаар холбогдох улс орнуудтай зөвшилцөхөд мөн бэлэн байна гэжээ.
Риановости зэрэг орон нутгийн хэвлэл мэдээллийн хэрэгслүүдийн мэдээлснээр ОХУ-ын ГХЯ-ны дэд сайд Андрей Руденко мөн өдөр сэтгүүлчдэд хэлэхдээ, "Дэлхийн хүнсний асуудлыг шийдэхийн тулд Оросын экспорт, санхүүгийн гүйлгээнд тавьсан хориг арга хэмжээг цуцлах зэрэг цогц үйл ажиллагааг авч хэрэгжүүлэх ёстой” гээд дээрх мэдэгдлийг мөн хийсэн байна.
Гэвч Украинаас далайн тээврээр үр тариа тээвэрлэхэд украинчуудын боомтуудад байршуулсан тэсрэх бөмбөгүүдийг юуны түрүүнд аюулгүй болгох шаардлагатайг тэрээр мөн онцлов. "Оросын тал уг асуудлыг энхийн замаар шийдвэрлэхийг зорьж буй хэн бугайтай ч яриа хэлэлцээ хийхэд бэлэн байна" гэж мөн цохон тэмдэглэжээ.
Украины өмнөд хэсгийн Мариуполь боомт хотод гацсан гадаадын хөлөг онгоцуудыг аюулгүй зорчиход туслах хүмүүнлэгийн коридор нээхээ ОХУ-ын Батлан хамгаалах яам өмнөх өдөр нь мөн мэдэгдсэн юм. Интерфакс агентлагийн мэдээлснээр, ОХУ-ын армийн жанжин штабын харьяа "Үндэсний батлан хамгаалах удирдлагын төв"-ийн командлагч Михаил Мизинцев мөн өдөр хэлэхдээ, "25-ны өдрийн өглөөний 8 цагаас эхлэн ойролцоогоор 185 км урттай, 3.2 км орчим өргөнтэй хүмүүнлэгийн коридор нээгдэнэ” хэмээн мэдэгджээ.
"Одоогоор 16 орны 70 хөлөг онгоц Херсон, Одесса зэрэг Украины зургаан боомтод гацаанд ороод байгаа ба Оросын арми өдөр бүр өглөөний 8-19 цагийн хооронд Хар тэнгисийн эрэгт хүмүүнлэгийн коридорыг нээх болно” хэмээн командлагч Мизинцев хэлэв. "Орос улс Хар тэнгис болон Азовын тэнгист хувийн хөлөг онгоцнуудыг аюулгүй зорчиход шаардлагатай бүхий л арга хэмжээг авч байгаа” хэмээн тэрээр дурдсан байна. Гэсэн хэдий ч Орос, Украины сөргөлдөөн Азовын тэнгист төдийгүй Хар тэнгист үргэлжилж байгаа энэ үед хувийн хөлөг онгоцнууд аюулгүй зорчиж чадах эсэх нь тун бүрхэг байгаа юм.
Эх сурвалж: Asiae