Америкийн спорт хувцас үйлдвэрлэгч Nike компани ОХУ-ын хамгийн том франчайз компанитайгаа гэрээгээ сунгахгүй байхаар шийдсэн тухай Оросын Бедомости бизнесийн сэтгүүлээс иш татан Ройтерс агентлаг орон нутгийн цагаар 25-ны өдөр мэдээлэв.

Тус мэдээнд дурдаснаар ОХУ-д цахилгаан бараа, спортын хувцас борлуулдаг Inventive Retail группын тэргүүн Тихон Смиков өөрийн ажилтнууддаа хандан бичсэн зурвастаа Nike компани Орост бүтээгдэхүүн нийлүүлэхээ больсон хэмээн мэдэгджээ.

"Nike брэндийн нэр дор үйл ажиллагаа явуулдаг бүх дэлгүүрийг хаахаас өөр сонголтгүй боллоо" хэмээн Смиков цохон тэмдэглэсэн байна.

Мөн тэрбээр Nike компани болон Inventive Retail групп нь анх 2012 онд гар нийлэн ажиллаж эхэлснээс хойш 10 жилийн дараа “хамтын бизнесээ үргэлжлүүлэх аргагүйд хүрлээ” гээд ОХУ-ын Украинд халдан түрэмгийлсэн тухай дурджээ.

Inventive Retail групп нь орон нутагт Up and Run гэх өөрийн охин компаниараа дамжуулан Nike брэндийн борлуулалтыг хийж ирсэн бөгөөд нийт 37 дэлгүүр байдгаас өдгөө цахим орчинд 28 дэлгүүр нь үйл ажиллагаагаа хэвийн явуулсаар байгаа юм.

ОХУ-ын Оюуны өмчийн газрын мэдээлснээр Up and Run компаниар тогтохгүй A3 Sports, Yar зэрэг бусад франчайз эзэмшигчидтэй байгуулсан Nike компанийн гэрээ 26-ны өдөр дуусгавар болох гэнэ.

Nike өнгөрөгч 3-р сарын эхээр ОХУ-ын Украинд өдүүлсэн дайнтай холбогдуулан тус улс дахь бүх дэлгүүрээ тодорхойгүй хугацаагаар хаахаа зарласан ба цаашид тус брэндийн борлуулалтыг хариуцан ажиллах аж ахуй нэгжүүд нь Nike-ийн төв оффистой огт хамааралгүй бизнесийн түншүүдээр дамжих болно хэмээн тайлбарлаж байсан юм.

Сүүлийн өдрүүдэд барууны томоохон компаниуд Оросын зах зээлийг ар араасаа бүрмөсөн орхиж буйгаа зарласаар байна. Тодруулбал хэдхэн хоногийн өмнө McDonald's болон Starbucks компаниуд татан буугдаж байгаагаа зарласан бол ExxonMobil, Shell, British American Tobacco, Renault зэрэг компаниуд ч тус улсыг орхихоор шийдсэн юм.

Эх сурвалж: SBS