Майкрософт компани хиймэл оюун ухааны технологийн баазаа бэхжүүлэхийн тулд дараагийн хоёр жилийн хугацаанд Японд 2.9 тэрбум ам.долларын хөрөнгө оруулалт хийх гэж буй талаар Kyodo News агентлаг мэдээлэв.
Түүнчлэн энэ удаагийн хөрөнгө оруулалт нь Майкрософт компанийн хувьд Японд хийж буй хамгийн том хэмжээний хөрөнгө оруулалт болно хэмээн тус мэдээнд дурджээ.
Тодруулбал тус компани нь Япон улс дахь хиймэл оюун ухааны технологийг өндөр хурдтайгаар боловсруулахад зайлшгүй шаардлагатай дата төвүүдийг өргөжүүлэхээр төлөвлөж байгаа аж.
Энэхүү хөрөнгө оруулалтаараа Майкрософт компани нь Токио, Осака хотуудад хиймэл оюун ухаанд зориулсан хагас дамжуулагч болох график боловсруулах нэгжээс (GPU) бүрдэх дата төвийн байгууламжуудыг өргөжүүлэхээр шийдсэн байна.
2014 оноос хойш Япон улсад дата төвөө ажиллуулж буй тус компани энэ удаад Токио хотноо хиймэл оюун ухааны технологийн судалгааны төв нээхээр мөн төлөвлөж байгаа аж.
Японы ерөнхий сайд Фумио Кишидагийн тун удахгүй АНУ-д хийх айлчлалын үеэр Майкрософт компани энэ тухай албан ёсоор олон нийтэд зарлахаар төлөвлөж байгаа талаар Nippon Keizai Shimbun сонин мэдээлэв.
Эх сурвалж: SBS