Ухаалаг гар утасны салбарыг тэргүүлэгчдийн нэг Apple брэнд Япон улсын зах зээлд худалдаалах гол бүтээгдэхүүнүүдийнхээ үнийг нэмжээ.
Улмаар хамгийн сүүлд гарсан iPhone 13 загварын хамгийн хямд хувилбарын үнэ л гэхэд 19 хувиар өссөн байна.
Харин бараа бүтээгдэхүүний үнийг юун учир ийн нэмэх болсныг тодруулбал япон иений ам.доллартой харьцах ханш эрчимтэй унаж, хоёр улсын бодлогын хүүгийн зөрүү нэмэгдсэнээр импортын барааны үнийг нэмэхээс өөр аргагүй нөхцөл үүссэн гэнэ.
Тийнхүү өнгөрөгч баасан гарагаас эхлэн Apple брэндийн бүтээгдэхүүнүүд нэмэгдэлтэй үнээр худалдаалагдах болсон бөгөөд iPhone 13 загварын утасны хувьд урьд 98,800 иен буюу нийт 730 ам.доллароор худалдаалагдаж байсан бол өдгөө 117,800 иений үнэ хүрэх болсон байна. Харин iPhone 13 SE загварын худалдаанд гарах үнэ 62,800 иенээс эхлэх болжээ.
Үнийн өсөлт Apple брэндийн Японд худалдаалагдах дийлэнх бүтээгдэхүүнийг хамарч байгаа бөгөөд iPad таблетын үнэ ч 25 хувиар нэмэгдсэн байна. Үйл явдлын хүрээнд Apple компанийн зүгээс ямар нэг тайлбар хийгээгүй ч үнийн өсөлт зөвхөн Япон улсыг л хамрах шинжтэй байгаа юм.
Эх сурвалж: Nikkei Asia