ОХУ-ын ерөнхийлөгч Владимир Путин мягмар гарагт Тегеран хотод зохион байгуулагдсан “Астана Тройка” дээд хэмжээний уулзалтын дараагаар, Канад улс Газпромд “Норд стрийм 1” шугамын турбиныг эргүүлэн өгөхгүй болбоос Европ тивд нийлүүлэх байгалийн хийн хэмжээ хоёр дахин буурах болно хэмээн мэдэгджээ.
Түүний тайлбарласнаар өдгөө “Норд стрийм 1” шугамын 2 турбин ажиллаж, өдөрт 60 сая орчим шоо метр хий шахаж байгаа бөгөөд Канад улсаас турбин ирвэл сайн хэрэг болох ч ирэхгүй бол тэд зөвхөн нэг турбинаар хий шахах хэрэгцээ үүсэж, өдөрт ердөө 30 сая шоо метр хий л нийлүүлж чадах гэнэ.
Ноён Путины хэлснээр, “Тэд бидэнд "Норд Стрийм 1" шугамын турбиныг Канад улсаас эргүүлэн өгнө хэмээн хэлж байгаа ч Газпром компанид албан ёсоор мэдээлэл ирээгүй л байна. Бидний хувьд мэдээж тэдгээр турбиныг эргүүлэн авах эрхтэй. Учир нь тэр бол бидний, Газпром компанийн өмч. Харин Газпром компанийн хувьд дан ганц турбиныг хүлээж авах бус холбогдох бичиг баримтыг ч хүлээн авах учиртай” гэжээ.
Эх сурвалж: ТАСС