Хиймэл оюун ухааны хагас дамжуулагчийн салбарт тэргүүлэгч Nvidia компанийн хувьцааны үнэ өссөөр АНУ-ын хөрөнгийн биржид бүртгэлтэй компаниудын дунд зах зээлийн үнэлгээгээрээ гуравдугаарт жагсах болжээ.

Орон нутгийн цагаар 14-ний өдөр Нью-Йоркийн хөрөнгийн бирж дээр Nvidia компанийн хувьцааны үнэ өмнөх өдрөөс 2,46 хувиар өсөж, 739 ам.долларт хүрсэн байна.

Улмаар тус компанийн зах зээлийн үнэлгээ 1.8253 их наяд ам.долларт хүрснээр АНУ-ын хөрөнгийн зах зээлд бүртгэлтэй компаниудын дунд Microsoft болон Apple-н дараа буюу гуравдугаарт бичигдэх болов.

Өмнөх өдрийг хүртэл зах зээлийн үнэлгээгээр гуравдугаарт бичигдэж байсан Google-ийн толгой компани болох Alphabet-ийн хувьцааны үнэ мөн өдөр ердөө 0.55 хувиар өсөж зах зээлийн үнэлгээ нь 1.8145 их наяд ам.долларт хүрсэн нь Nvidia-гийнхаас доогуур байгаа юм.

Nvidia компанийн хувьд өмнөх өдөр нь Аmazon-ыг ардаа орхин, зах зээлийн үнэлгээгээрээ дөрөвдүгээрт бичигдэж эхэлсэн бол маргааш нь ийнхүү Alphabet-ийг гүйцэж түрүүлсэн байна.

Nvidia-ийн хувьцааны үнэ энэ он гарсаар 49 хувиар өсөөд байгаа бөгөөд өнгөрсөн нэг жилийн хугацаагаар авч үзвэл 221 хувийн өсөлтийг үзүүлжээ.

Эх сурвалж: MBC