Тайванийн асуудлаар АНУ, БНХАУ-ын хооронд хурцадмал байдал үүсэж байгаа энэ үед Жо Байдены засаг захиргаа “Minuteman-3” тив алгасагч баллистик пуужингийн туршилт хийх хугацаагаа хойшлуулсан тухай гадаадын хэвлэлүүд мэдээллээ.

АНУ-ын Агаарын цэргийн хүчин энэ долоо хоногт Калифорни дахь Ванденберг агаарын цэргийн баазаас "Glory Trip” хэмээн нэрлэгдээд буй “Minuteman-3” тив алгасагч баллистик пуужингийн туршилтыг хийхээр төлөвлөж байсан ч хойшлуулсан талаар албаны хүн мэдэгдсэн байна.

Уг туршилтын үйл явцыг хойшлуулахыг Батлан ​​хамгаалахын сайд Ллойд Остины зүгээс тушаасан ба БНХАУ-тай харилцаагаа цаашид муутгахгүй байх зорилготой байсан тухай тус салбарын албаны хүн дурджээ.

"Уг нь бол энэ удаагийн туршилтыг удаан хугацаанд бодож төлөвлөж байсан хэдий ч Тайванийг тойрсон Хятадын армийн үйл ажиллагаанаас үүдэн үл ойлголцол үүсгэхгүйн тулд хойшлуулсан юм" хэмээн тус албаны хүн хэвлэлд онцлон тэмдэглэжээ.

АНУ-д эрх мэдлээрээ гуравдугаарт эрэмблэгддэг конгрессийн төлөөлөгчдийн танхимын дарга Нэнси Пелосигийн Тайваньд айлчлал хийхийг эсэргүүцсэн Хятадын Ардын чөлөөлөх арми Тайванийн ойролцоо томоохон хэмжээний цэргийн сургуулилт хийж байгаа билээ.

Тодруулбал, өнгөрөгч 4-ний өдөр Тайванийг тойрсон ус руу 11 пуужин харваж, яаралтай үед АНУ-ын оролцоог таслан зогсоох сургалт явуулсан гэж тайлбарлав.

АНУ-ын хувьд тив алгасагч баллистик пуужингийн системийн найдвартай байдлыг үнэлэх зорилгоор “Glory Trip"-ын туршилтыг жилд хэд хэдэн удаа тогтмол хийдэг байсан юм. Гэвч өнгөрөгч гуравдугаар сард хийхээр төлөвлөсөн байсан туршилтыг Украинд халдан довтолсон ОХУ-тай хурцадмал байдалд хүргэх вий гэх болгоомжлолын үүднээс мөн л хойшлуулсан билээ.

"Minuteman-3" пуужингийн туршилт арав орчим хоногоор хойшлох төлөвтэй байна гэж гадаадын хэвлэлүүд мэдээлжээ.

Эх сурвалж: SBS