Япон автомашины үндэстэн дамнасан компани болох Хонда Солонгосын LG Энержи Сольюшн компанитай хамтран АНУ-д 4.4 тэрбум ам.долларын өртөг бүхий цахилгаан автомашины зайн үйлдвэр барих гэрээг үзэглэжээ.
Компаниудын зүгээс үйлдвэрийг АНУ-ын аль мужид барих тухай тодорхой мэдээлэл өгөөгүй байна. Гэвч тэдний мэдэгдсэнээр үйлдвэрийг барих ажлыг 2023 оны эхээр эхлүүлэх бөгөөд 2025 оны сүүл гэхэд тухайн үйлдвэрт масс үйлдвэрлэл явуулж эхлэх гэнэ.
Харин үйлдвэрийг яагаад АНУ-д барихаар төлөвлөсөн тухай тодруулахад Хойд Америкт цахилгаан автомашины зах зээл эрчимтэй өсөж, тус улс дахь цахилгаан автомашины үйлдвэрлэл нэмэгдэж байгаатай холбоотой гэж тайлбарлажээ.
Хондагийн хувьд одоогийн байдлаар АНУ-ын зах зээлд цахилгаан автомашин огт нийлүүлээгүй байгаа ч 2024 онд Prologue гэх цахилгаан автомашиныг нэвтрүүлэхээр төлөвлөөд байгаа юм. Тийнхүү Хонда 2030 он гэхэд дэлхийн зах зээлд нийт 30 загварын цахилгаан автомашин гаргаж, 2040 оноос Хойд Америкийн зах зээлд зөвхөн цахилгаан автомашин гаргах болжээ.
Эх сурвалж: CNN