Кит Жонсон хэмээх АНУ-ын иргэн Илон Маскийг Dogecoin криптовалютаар пирамид бүтэцтэй луйврын хэрэг үйлдсэн гэж буруутган шүүхэд мэдүүлэн 258 тэрбум ам.доллар нэхэмжилсэн билээ. Тус хэрэг өдгөө нийт долоон нэхэмжлэгч, зургаан хариуцагчтай болон өргөжөөд байна.

Мягмар гарагийн орой Манхэттен дэх Холбооны шүүхэд гаргасан нэмэлт гомдолд дурдсанаар Маск болон түүний цахилгаан автомашины компани Tesla, сансрын аялал жуулчлалын компани SpaceX, туннель барилгын компани Boring Co зэрэг хариуцагч талууд нь Dogecoin криптовалютын ханшийг хоёр жилийн хугацаанд зориудаар 36,000 хувиар өсгөсөн бөгөөд дараа нь мөн зориудаар уналтад оруулсан гэжээ.

Ийм замаар хариуцагч талууд Dogecoin-д хөрөнгө оруулагчдын мөнгөнөөс "олон арван тэрбум ам.долларын ашиг олсон" бөгөөд уг крипто нь бодит үнэ цэнгүй, одоогийн үнэ цэн гэх зүйл нь "зөвхөн маркетингийн үр дүн байж" хэмээн гомдолд дурджээ. Анхны нэхэмжлэлийг зургаадугаар сард гаргасан бөгөөд шүүх хурал үргэлжилж байна. Tesla, SpaceX, Boring компаниудаас Лхагва гарагт тайлбар өгөхийг хүссэн боловч шуурхай хариулсангүй.

Эх сурвалж: Reuters