Украины арми сүүлийн үед хүчтэй сөрөг довтолгоо хийж дайны нөхцөл байдлыг эргүүлэх оролдлогыг амжилттай хийж байгаа ч энэхүү дайныг эхлүүлсэн ОХУ-ын ерөнхийлөгч В.Путин байр сууриа өөрчлөх магадлал тун бага байгаа талаар түүнтэй ярилцсан барууны удирдагчид онцолжээ.

НҮБ-ын ерөнхий нарийн бичгийн дарга Антониу Гутерреш мөн өдөр ерөнхийлөгч Путинтэй ярилцсаныхаа дараа сэтгүүлчидтэй уулзах үеэрээ “Дайн дуусах хүртэл ахиад багагүй хугацаа үлдсэн бололтой” хэмээн хэлснийг Associated Press болон CNN зэрэг гадаадын хэвлэл мэдээллийн хэрэгслүүд орон нутгийн цагаар 14-ний өдөр мэдээлэв.

Тэрээр үргэлжлүүлэн “Энэ дайн Украиныг сүйрүүлсэн төдийгүй дэлхийн эдийн засгийг боомилж байна. Гэвч хоёр тал удахгүй энхийн гэрээ байгуулна гэвэл худал хэлсэн болно” хэмээн мэдэгджээ.

Мөн дэлхийн хүнсний хямралыг бага ч болов шийдэх үүднээс Оросын бордоог Украины Хар тэнгисийн боомтоор экспортлох, Украины Запорожье атомын цахилгаан станцын аюулгүй байдлыг хангах талаар Путинтэй ярилцсан гэдгээ нэмж дурдсан байна.

Түүнчлэн 13-ны өдөр ерөнхийлөгч Путинтэй 90 минут ярилцсан Германы канцлер Олаф Шольц мөн өдөр хэлэхдээ, "Харамсалтай нь, Путин Украиныг эзлэн түрэмгийлэх шийдвэр гаргасан нь алдаа байсан гэдгийг ойлгоогүй бололтой. Түүний байр суурь өөрчлөгдсөн өчүүхэн ч шинж тэмдэг ажиглагдсангүй” гэжээ.

Тэрээр Путинаас гал зогсоохыг уриалж, гал зогсоосны дараа Украины нутгийг бүрмөсөн орхин гарч, тус улсын бүрэн эрх, нутаг дэвсгэрийн бүрэн бүтэн байдлыг хүндэтгэхийг уриалсан гэж тайлбарлав.

Үүний зэрэгцээ, Украины арми саяхан зүүн хойд нутгийн Харьков хотыг эргүүлэн авахад "Герман улсын зүгээс Украинд нийлүүлсэн зэр зэвсэг шийдвэрлэх үүрэг гүйцэтгэсэн" гэж ерөнхий сайд Шольц цохон тэмдэглэсэн байна.

Украины Гадаад хэргийн сайд Дмитро Кулева өмнөх өдөр нь өөрийн Твиттер хуудаснаа “Геноцидийг зогсоож, Украины ард иргэдийг чөлөөлөхийн тулд цэргийн нэмэлт тусламж шаардлагатай байна” хэмээн жиргээд Германыг зэвсэг нийлүүлэх тал дээр хойрго хандаж байна гэж шүүмжилсний хариуд Шольц ийнхүү мэдэгдэж буй бололтой.

Герман улсын хувьд газрын тос, байгалийн хийн гол түнш болсон ОХУ-тай найрсаг харилцаагаа хадгалж үлдэхээр хичээж ирсэн ч өнгөрөгч хоёрдугаар сард дайн эхэлснээс хойш цэргийн хүчээ үл нэмэгдүүлэх батлан хамгаалахын бодлогоосоо ухарч НАТО-гийн стандартын дагуу цэргийн зардлыг дотоодын нийт бүтээгдэхүүний (ДНБ) 2 хувьд хүргэх зэргээр төрийн бодлоготоо өөрчлөлт оруулж байна гэж ВВС суваг тайлбарлав.

Эх сурвалж: Yonhap