АНУ-ын автомашин үйлдвэрлэгч Форд компанийн зүгээс инфляци болон нийлүүлэлтийн сүлжээний асуудлаас үүдэн гуравдугаар улиралд нэг тэрбум ам.долларын нэмэлт зардал гарах талаар мэдэгдсэний дараа тус компанийн хувьцааны үнэ унасан байна.
CNBC сувгийн орон нутгийн цагаар 19-ний өдөр мэдээлснээр, тус компани өөрийн хувьцаа эзэмшигчдэдээ нийлүүлэлтийн сүлжээний асуудлаас болж 40,000-45,000 нэгж автомашины үйлдвэрлэлд нөлөөлөхүйц эд ангийн хомсдол үүссэн гэж мэдэгджээ.
Дээр дурдсан автомашинууд дунд голчлон ашгийн хувь өндөртэй ачааны машин болон SUV ангиллын автомашинууд багтаж буй бөгөөд эдгээр автомашинууд нь дөрөвдүгээр улиралд дуусч, зах зээлд нийлүүлэгдэх төлөвтэй байгаа аж.
Тус компанийн энэ оны хувьцааны ногдол болон, татварын өмнөх ашиг (EBIT) урьдын адил 11.5-12.5 тэрбум ам.доллароор хэмжигдэх төлөвтэй байгаа юм. Харин гуравдугаар улирлын ашиг 1.4-1.7 тэрбум ам.долларт хүрэх таамгийг дэвшүүлсэн байна.
Энэхүү мэдэгдэл гарснаас хойш Форд компанийн хувьцааны үнэ 4 хувиар унажээ.
Автомашин үйлдвэрлэгчид цар тахлын хямралаас хойш нийлүүлэлтийн сүлжээний асуудалтай тэмцсээр байгаа билээ. Хэдийгээр сэлбэг хэрэгсэл, тэр дундаа хагас дамжуулагч чиптэй холбоотой асуудал үргэлжилсээр байгаа ч эрэлт өндөр хэвээр байгаа юм.
Фордын хамгийн хүчтэй өрсөлдөгч болох Женерал Моторс (GM) компанид ч үүнтэй төстэй асуудал тулгараад байгаа бөгөөд өнгөрсөн долдугаар сард сэлбэг хэрэгслийн хомсдолоос үүдэн үйлдвэрлэлийн явц дуусаагүй 95,000 нэгж автомашин байгаа талаараа хувьцаа эзэмшигчдэдээ тайлагнаж байв.
Эх сурвалж: Newsis