Nvidia Corp компани видео тоглоомчдод зориулсан шинэ график чипээ танилцууллаа. Компанийн нэрийн бүтээгдэхүүн болно гэж үзэж буй тус чип нь хиймэл оюун ухаан дээр суурилан график үзүүлэлтийг сайжруулан харуулдаг аж. Тэрчлэн, бүтээгдэхүүний үйлдвэрлэлийг Тайвань дахь TSMC компани хариуцах ажээ.
Nvidia сүүлийн жилүүдэд хиймэл оюун ухаанд суурилсан чип худалддаг дата төвийн бизнесээрээ дэлхийн технологийн ертөнцийн анхаарлын төв ороод байгаа. Гэвч тус компанийн бизнесийн гол орлогыг график чип бүрдүүлсэн хэвээр байна. Тухайлбал, сүүлийн санхүүгийн нэг жилд Nvidia 26.9 тэрбум ам.долларын орлоготой ажилласны 59 хувь нь график чипний борлуулалтаас орж ирсэн юм.
Улмаар Nvidia-ийн гүйцэтгэх захирал Женсен Хуан есдүгээр сарын 20 өдөр англи зохиолч, математикч Ада Лавлейсийн нэрээр нэрлэсэн шинэ цуврал график чипээ танилцуулав. Тус цувралын GeForce RTX 4090 хэмээх эхний загвар нь аравдугаар сарын 12 өдөр 1,599 ам.долларын үнэтэйгээр худалдаанд гарах юм.
Nvidia чип бүтээдэг боловч үйлдвэрлэлээ олон улсын түнш компаниуддаа даатгадаг. Энэ удаад өмнөх загваруудыг үйлдвэрлэсэн Samsung Electronics-тай хамтран ажиллахгүй аж. Оронд нь Тайваний TSMC компанид захиалан үйлдвэрлүүлэхээр шийдлээ.
Lovelace нэрийн чип нь АНУ-аас Хятадын эсрэг тавьсан хоригт хамаарахгүй тул дэлхий даяар худалдана гэв. Тэрчлэн дотроо hashrate хязгаарлагч буюу Ethereum криптовалютыг олборлоход хязгаар тогтоодог технологи дотроо агуулаагүй онцлогтой юм байна.
Эх сурвалж: Reuters