Даваа гарагт Ассошиэйтед Пресс агентлагаас мэдээлснээр Google компани эх газрын Хятадад Google Translate автомат орчуулгын үйлчилгээгээ нийлүүлэхийг зогсоожээ.
Улмаар одоо эх газрын Хятадаас Google Translate аппликэйшн, веб хуудаст хандсан тохиолдолд Google-ийн хайлтын хуудас гарч ирэх болсон байна.
Хэрэглэгчдийн мэдэгдсэнээр тэд өнгөрөгч бямба гарагаас хойш орчуулгын үйлчилгээ авч чадахгүй байсан юм.
Google компаниас тайлбарласнаар тэд эх газрын Хятадад орчуулгын үйлчилгээгээ нийлүүлэхгүй болсон нь хэрэглээ багатай байсантай холбоотой гэсэн байна. Гэвч тэдний зүгээс эх газрын Хятадад Google Translate үйлчилгээг яг хэчнээн хүн ашигладаг байсныг тодруулж хэлээгүй юм.
Эх сурвалж: AP News