BioNTech-ийг үүсгэн байгуулагч, Pfizer вакциныг хамтран бүтээсэн герман хос ирэх 10 жилийн дотор хавдрын эсрэг вакцин нээх боломжтой гэв. Түүнчлэн, даруу эрдэмтдийн зангаар тэд “хавдрын эмчилгээг олж нээнэ” гэж хэлэхгүй байгаа ч хэд хэдэн том дэвшил гарсан тул “бүрэн боломжтой” хэмээсэн юм.

Герман дахь гэр бүлийн хос Угур Шахин, Озлем Туречи нар хавдрын эсрэг шинэ эмчилгээ нээх зорилгоор 2008 онд BioNTech компанийг үүсгэн байгуулсан. Тэд хавдрын эсрэг судалгаанд mRNA технологийг ашиглаж байсан нь ковидын эсрэг вакцин Pfizer-ийг бүтээхэд суурь технологи болсон аж. Харин одоо “Бидний хавдрын эсрэг хийсэн олон жилийн судалгаа ковидын вакциныг бүтээх суурь болсон. Харин одоо Pfizer-ийн амжилт нь эргээд хавдрын эсрэг вакцин бүтээхэд том дэмжлэг болж байна” хэмээн профессор хос өгүүллээ.

Уламжлалт вакциныг бүтээхдээ тухайн өвчнийг үүсгэгч вирусийн сулруулсан хувилбарыг гарган авч биед тарьдаг бол mRNA технологи нь вирусийн зөвхөн генетик кодыг ашигладаг юм. Улмаар биед нэвтрэн эсүүдэд эсрэг биет үүсгэх өдөөгч болж өгснөөр дархлалын систем тухайн вирусийг таньж дараа, дараачийн удаа тухайн вирусийн эсрэг тэмцэж чаддаг болно.

Moderna наймдугаар сард BioNTech-ийг патентын эрх зөрчсөн хэмээн буруутган шүүхэд өгсөн. Энэ тухайд профессор Шахин “Бидний нээлт бол анхдагч. Энэ төрлийн эмчилгээг нээхийн тулд 20 гаруй жил хөдөлмөрлөсөн. Мэдээж, бид оюуны өмчийн эрхийнхээ төлөө тэмцэнэ” хэмээв.

Эх сурвалж: Bloomberg