Мягмар гарагт Блумберг Ньюс сувгаас мэдээлснээр саяхан Credit Suisse банкийг худалдан авсан UBS групп тус банкны нийт ажилтнуудын талаас илүү хувийг орон тооны цомхотголд оруулахаар төлөвлөж байна гэжээ.
Улмаар орон тооны цомхотголын хүрээнд тус банкны Лондон, Нью Йорк хотууд болоод Азийн зарим хэсэгт ажилладаг банкирууд, арилжаачид, туслах ажилтнууд олноор ажилгүй болох гэнэ.
Эх сурвалжийн мэдээлснээр UBS групп дотроо ч орон тооны цомхотгол хийнэ гэсэн бөгөөд хоёр компаниас нийт 35,000 хүнийг орон тооны цомхотголд оруулахаар төлөвлөж байгаа гэсэн юм. Одоогоор Credit Suisse банк нийт 45,000 ажилтантай байгаа ажээ.
Үйл явдлын хүрээнд Ройтерс агентлагаас UBS групп болоод Credit Suisse банканд хандсан ч тэд мэдээлэл өгөхөөс татгалзсан байна.
Эх сурвалж: The Reuters