АНУ-ын хууль сахиулах байгууллагаас харилцаа холбооны нэгэн томоохон компанийг мөрдөн шалгах ажиллагаа явуулж байх үед Хятадын хоёр иргэн мөрдөх ажиллагаанд саад учруулах, хяналтын ажилтнуудыг тагнуул болгон элсүүлэх зорилгоор олон мянган ам.долларыг бэлнээр болон үнэт эдлэл, биткойн хэлбэрээр санал болгожээ.
Гэвч тэдгээр хяналтын ажилтан нь АНУ-ын Холбооны мөрдөх товчооны тагнуулаар давхар ажилладаг байсан тул Хятад иргэд үйлдэл дээрээ баригдсан юм. Тэднээс гадна 11 хятад иргэнийг тагнуулын хоёр хэрэгт шалгаж байна. Өөрсдийгөө Гоучүн Хэ, Жэн Ван хэмээн мэдүүлсэн тэдгээр хятад иргэн гэрч, нотлох баримт, болзошгүй эрүүгийн хариуцлага зэрэг мөрөн шалгах явцын дэлгэрэнгүй мэдээллийг авах зорилготой байжээ. Мөн хууль сахиулагчдаас стратегийн хурал, уулзалтуудын бичлэгийг нууцаар хийхийг хүсэж их хэмжээний мөнгө санал болгосон юм. Хэргийн явцад Америкийн талын тагнуулууд хятад иргэдэд хуурамч баримт бичиг дамжуулан өгч, хариуд нь өнгөрсөн долоо хоногт хахуулийн мөнгө хүлээн авснаар хэрэг батлагдсан юм.
Даваа гаригт болсон хэвлэлийн бага хурал дээр компанийн нэрийг дурдаагүй. Гэвч АНУ-ын хэвлэлүүд хэрэгт холбогдсон тус компанийг Хятадын технологийн аварга Huawei мөн гэж нууц эх сурвалжуудаас эш татан мэдээлсээр байгаа юм. Холбогдох бүх албаныхан компанийн нэрийг баталгаажуулахаас татгалзлаа.
Эх сурвалж: BBC