Уур амьсгалын идэвхтэн Грета Тунберг энэ жил зохион байгуулагдах COP уур амьсгалын талаарх бага хуралд оролцохгүй гэдгээ мэдэгджээ. Түүний зүгээс энэхүү хурлыг “залилан” хэмээн тодорхойлсон байна.
COP27 /27th Conference of the Parties/ буюу Уур амьсгалын тухай НҮБ-ын Суурь Конвенцод нэгдэн орсон улс орнуудын хориндолоодугаар бага хурал болоход өдгөө хэдхэн хоног үлдээд байгаа юм. Энэ удаагийн хурал арваннэгдүгээр сарын 6-18-ы өдрүүдэд Египет улсад зохион байгуулагдах билээ.
Грета Тунбергийн хувьд 2018 оноос хойш тус бага хуралд оролцож ирсэн ч энэ жил тийнхүү оролцохоо больж байгаа юм. Өдгөө 19 настай Грета Тунберг нь багаасаа л уур амьсгалын өөрчлөлтийн хүрээнд дуу хоолойгоо өргөж, үзэл бодлоо илэрхийлэн дэлхийн удирдагч нараас эмээлгүй шаардлага тавьж ирсэн.
Харин энэ удаагийн бага хуралд оролцохгүй шалтгаанаа тэрээр тайлбарлахдаа, “Надад энэ жилийн COP27 бага хуралд оролцохгүй байх маш олон шалтгаан байна. Үүний нэг нь энэ онд иргэний нийгмийн орон зай тун хязгаарлагдмал байгаа юм. Уур амьсгалын талаарх бага хуралд түлхүү улс орны удирдагчид хийгээд эрх мэдэлтнүүд оролцож, байгаль орчинд ээлтэй санаануудаар өөрсдийн маркетингийг хийх болсон.
Миний бодлоор энэхүү бага хурлын гол зорилго бол системийг бүхэлд нь өөрчлөх бус харин аажмаар илэрч буй ахиц дэвшлийг хянах юм. Гэвч дэлхийн уур амьсгалын байдлыг харвал COP-ийн гишүүн орнууд ажлаа хийхгүй байна. Бидний зүгээс хүмүүст энэхүү бага хурал нь ямар том залилан болохыг ойлгуулж, COP-ийн гишүүн орнуудыг ажлаа хийхэд шахаж шаардахгүй болбоос тэд ажлаа хийхгүй” гэжээ.
Эх сурвалж: UNILAD