Amazon-ийн үүсгэн байгуулагч Жефф Безос, дуу хөгжмийн бизнес салбарын магнат Жэй Зи нар хамтарч Америкийн үндэсний хөлбөмбөгийн лигийн Washington Commanders багийг 6 тэрбум ам.доллароор худалдан авах санал хүргүүлжээ.
Washington Commanders-ийн одоогийн эзэмшигч Дэн Снайдер санхүүгийн гэмт хэрэгт шалгагдаж буй тул багаа худалдахаас өөр аргагүйд хүрсэн юм. Жефф Безос дангаар 5.5 тэрбум ам.доллар гаргахад бэлэн байгаа хэмээн ойрын эх сурвалж мэдээллээ. Харин реппер Жэй Зи өөрийн Roc Nation компаниар дамжуулан спортын агентлаг удирддаг бөгөөд 2019 онд Super Bowl-ийн шоунд зөвлөх түншээр хамтран ажиллаж байсан юм. Тэрчлэн, хөрөнгө оруулалтын салбарын тэрбумтан Жош Харрис тус багийг худалдан авах өрсөлдөөнд оролцох шинжтэй байна.
Зургаан тэрбум ам.долларын үнэлгээ нь NFL-ийн спортын түүхэнд дээд амжилт болно. Сүүлд зун Walmart сүлжээ дэлгүүрийн өв залгамжлагч тэрбумтан Роб Уолтон Denver Broncos багийг 4.6 тэрбум ам.доллароор худалдан авсан билээ.
Эх сурвалж: Financial Times