Бямба гарагт Палестины исламист Хамас бүлэглэл Израиль улс руу гэнэтийн дайралт хийж, 1,100 гаруй хүн амиа алдаж, ням гарагт Израиль улсын зүгээс Хамас бүлэглэлийн эсрэг дайн зарласан билээ. Тэгвэл даваа гарагт эл мэдээг дуулсан олон улсын томоохон авиакомпаниуд Израиль улс руу үйлдэх нислэгүүдээ хойшлуулах эсхүл цуцлах арга хэмжээ авах болжээ.
BBC сувгаас мэдээлснээр одоогоор АНУ-ын 3 агаарын тээвэрлэгч, Эйр Франц, Луфтханза, Эмиратс зэрэг авиакомпаниуд Тель-Авив хотыг зорих нислэгүүдээ зогсоосон байна. Харин Британийн Виржин Атлантик авиакомпани Тель-Авив хотыг зорих нислэгүүдээ цуцлах болон хойшлуулах арга хэмжээ авсан бол Бритиш Эйрвэйс авиакомпани нислэгүүдийнхээ хуваарьт өөрчлөлт оруулжээ.
Гэсэн хэдий ч улс орнуудын агаарын орон зайд зорчиж буй агаарын хөлгүүдийг хянадаг FlightRadar24 хуудаснаас үзвэл Ryanair болон Pegasus авиакомпаниуд даваа гарагт ч Тель-Авивын агаарын орон зайд нислэг үйлдэж байсан юм.
Эх сурвалж: BBC