Терра блокчэйн сүлжээний үүсгэн байгуулагч Квон До Серби улсад нуугдаж байгаа тухай БНСУ-ын Сөүл хотын өмнөд хэсгийг хариуцсан прокурорын газраас мэдээлжээ. Тэдний зүгээс Квон Дог баривчлахаар Серби улсын цагдаагийн албатай хамтран ажиллахаа мэдэгдсэн байна.
Өдгөө 31 настай Квон Догийн хувьд Терра блокчэйн сүлжээг ашиглан залилан үйлдэж, хөрөнгийн зах зээлийн хуулийг зөрчсөн хэргээр өнгөрөгч есдүгээр сараас хойш Интерполоор эрэн сурвалжлагдах болсон юм.
Харин Квон Догийн зүгээс Солонгосын прокурорын газрын мэдэгдлийг үгүйсгэж, “Би ерөөсөө ч нуугдаагүй. Бидэнтэй харилцахыг хүссэн засгийн газрын ямар ч байгууллагатай бид бүрэн хамтарч ажиллана. Бидэнд нуух зүйл үгүй” хэмээж байсан билээ. Гэсэн ч тэрээр байгаа газраа илчлэхгүй өдий хүрсэн юм. Тиймээс БНСУ болон Серби улс хамтран Интерполоор эрэн сурвалжлагдаж буй түүнийг баривчлах болжээ.
Эх сурвалж: BBC