Иран улсын шүүх байгууллагаас Тегеран дахь жагсаалд оролцсон 400 хүнд 10 хүртэлх жилийн хорих ял оноожээ.
Тус улсын ерөнхий прокурорын хэлснээр ял сонссон хүмүүсээс 160 “үймээн дэгдээгч”-д 5-10 жилийн хорих ял оноосон бол 80 хүнд 2-5 жил, үлдсэн 160 хүнд 2 болон түүнээс доош жилийн хорих ял оноосон гэнэ. Мөн хорих ял сонссон хүмүүсээс гадна 70 хүнд мөнгөн торгууль ногдуулжээ.
Иран улсын хувьд тийн олон хүнд хорих ял оноохоос өмнө жагсаалд оролцсон хоёр ч хүнийг олны өмнө цаазлаад байсан юм.
Иран улсын ард иргэд засгийн газрынхаа эсрэг жагсаад өдгөө 3 сарын нүүрийг үзэж байгаа ч нааштай үр дүнд хүрэхгүй байгаа бол тус улсын эрх мэдэлтнүүдийн дүрсэлж байгаагаар энэхүү жагсаал нь гадны нөлөө бүхий зохион байгуулалттай “үймээн самуун” ажээ.
Хүний Эрхийн төлөө Тэмцэгчдийн мэдээллийн агентлагаас мэдээлсэн дагуу одоогийн байдлаар жагсаалын улмаас дор хаяж 490 орчим хүн амь үрэгдсэн бөгөөд 18200 хүн баривчлагдсан гэнэ. Гэвч эрх баригчдын зүгээс яг хэчнээн хүнийг баривчлан саатуулснаа зарлаагүй байна.
Эх сурвалж: BBC