ОХУ-ын ерөнхийлөгч Владимир Путин БНХАУ-ын дарга Ши Жиньпинийг ирэх хавар Москва хотноо албан ёсоор урьжээ.
Ройтерс, ТАСС, Спутник зэрэг томоохон хэвлэл мэдээллийн агентлагуудын мэдээлснээр, орон нутгийн цагаар 30-ны өдөр төрийн мэдлийн телевизийн сувгаар хоёр удирдагчийн цахим уулзалт цацагдах үеэр ерөнхийлөгч Путин Ши Жиньпин даргад хандан "Бидэнд биечлэн уулзах боломж олдоно гэдэгт эргэлзэхгүй байна. Ирэх хавар таныг Москва хотноо төрийн айлчлал хийхийг бид тэсэн ядан хүлээж байна” хэмээн цохон тэмдэглэсэн байна.
Ши Жиньпин даргын Москвад хийх айлчлал нь "Орос, Хятад хоёр орны эв нэгдлийг дэлхий дахинд харуулахаас гадна шинэ онд хоёр орны дипломат харилцаанд тохиох улс төрийн томоохон үйл явдал болох юм” гэж ерөнхийлөгч Путин дурдсан аж.
Украинд өрнөж буй дайн аль хэдийн 10 сарынхаа нүүрийг үзэж буй энэ үед ерөнхийлөгч Путин цэрэг, батлан хамгаалахын салбарт хамтран ажиллахыг Ши Жиньпинээс хүссэн байна. Харин Хятад улс ч ОХУ-тай стратегийн хамтын ажиллагаагаа өргөжүүлэн хөгжүүлэхэд бэлэн байгаагаа энэ үеэр илэрхийлжээ.
Эх сурвалж: MBC