Британийн шар айраг үйлдвэрлэгчид шар айрганд агуулагдах спиртийн хэмжээг бууруулж эхэлжээ. Олон улсын зах зээлд эрчийг авч буй инфляцын өсөлтийн хариуд бүтээгдэхүүнийхээ гол найрлага болох спиртийн агууламжийг бууруулснаар үнийг нь өсгөхгүй байх гэж хичээж буй нь энэ бололтой.

CNN агентлаг орон нутгийн цагаар 19-ний өдөр мэдээлэхдээ Их Британийн шар айраг үйлдвэрлэгчид инфляцын өсөлтөөс зайлсхийхийн тулд шринкфляци аргыг хэрэглэж байна хэмээн онцолжээ.

Шринкфляци гэдэг нь бүтээгдэхүүний үнийг өсгөхгүйгээр тухайн бараа бүтээгдэхүүний тоо хэмжээ, орц найрлагыг багасгах замаар зардлаа бууруулдаг стратегийн арга юм.

Тухайлбал Британийн шар айрагны сүлжээ уушийн газар болох Green King нь өөрийн нэрийн, олонд танигдсан але шар айрагныхаа спиртийн агууламжийг 5 хувь байсныг 4.8 болгон бууруулсан байна. Мөн өнгөрөгч 3-р сард Британийн хамгийн эртний шар айраг үйлдвэрлэгчдийн нэг Шеппард Нимс компани голлох шар айрагнуудынхаа спиртийн агууламжийг 4.5-5.4 хувиас 4.2-5.2 хувь болгон бууруулснаа зарласан юм.

CNN агентлаг Их Британийн орон нутгийн хэвлэлээс иш татан мэдээлснээр шар айраг үйлдвэрлэгчид бүтээгдэхүүнийхээ лонх, лаазны хэмжээг өөрчлөөгүй ч спиртийн агууламжийг бууруулсан талаар мэдээлсэн байна.

Тэрчлэн Их Британийн архины татварын хуулийн дагуу бүтээгдэхүүнийхээ спиртийн агууламжийг бууруулснаар шар айраг үйлдвэрлэгчид татвараа ч хэмнэх боломжтой болж буй юм.

Green King-ийн хэвлэлийн төлөөлөгч хэлэхдээ “Бүтээгдэхүүнийхээ спиртийн агууламжийг бууруулсан явдал нь түүхий эд, сав баглаа боодол төдийгүй эрчим хүчний үнийн өсөлтөөс үүдэлтэй инфляцын дарамтыг нөхөхөд тусалсан” хэмээн цохон тэмдэглэв.

Түүнчлэн Голландын шар айраг үйлдвэрлэгч Heineken компани өнгөрөгч нэгдүгээр сард Их Британид зарагддаг шар айрагны спиртийн агууламжийг 4 хувиас 3.7 хувь болгон бууруулжээ. "Хэрэглэгчид тэнцвэртэй амьдралын хэв маягийн нэг хэсэг болгон спиртийн агууламж багатай бүтээгдэхүүнийг сонгож байна. Компанийн хувьд урьд өмнө байгаагүй их хэмжээний зардалтай ажиллаж байгаа нь үнэн” хэмээн тус компанийн зүгээс мэдэгдсэн байна.

Эх сурвалж: Maeil