Сарын өмнө OceanGate далайн гүн дэх аяллын компанийн хөлгөөр аялж явсан таван хүн амь эрстсэн харамсалтай хэрэг гарсан билээ. Улмаар цахим орчинд хүмүүс тус компанийн хариуцлагагүй байдлыг янз бүрээр л хэлж, бичиж, шүүмжилсэн юм. Тэгвэл саяхан тэд веб хуудсаа хаан цахим сүлжээн дэх бүх хаягаа устгажээ.

Daily Mail хуудаснаас мэдээлж байгаагаар тэдний энэ алхам нь харамсалтай ослыг нуун дарагдуулах гэсэн оролдлого гэсэн юм.

Өдгөө тус компанийн веб хуудаст хандваас ганц л өгүүлбэр гарч ирж буй бөгөөд энэ нь “OceanGate Expeditions бүх төрлийн аяллын үйлчилгээ болон арилжааны үйл ажиллагаагаа зогсоосон” гэх ажээ.

Мөн түүнчлэн тэдний Инстаграм, Фейсбүүк платформ дахь хаягууд ч ор мөргүй алга болсон ба LinkedIn хүний нөөцийн сүлжээн дэх бүртгэл нь ч байхгүй болсон байна.

Компанийн зүгээс өнгөрөгч долоо хоногт үйл ажиллагаагаа зогсоож буйгаа мэдэгдсэн ч цахим сүлжээн дэх хаягууд нь идэвхтэй хэвээр байсан юм.

Эх сурвалж: Daily Mail