2022 оны хоёрдугаар сард ОХУ Украины нутаг дэвсгэрт цэргийн тусгай ажиллагаа явуулах болсон билээ. Улмаар ОХУ-ын эл үйлдлийг эсэргүүцсэн орнууд тэдний эсрэг хэд хэдэн хоригийн арга хэмжээг авч хэрэгжүүлэх болсон юм. Тэгвэл Оросыг эсэргүүцэх хоригийн арга хэмжээний нэг хэсэг болгож Япон улс ОХУ руу зарим төрлийн автомашиныг экспортлохоо зогсоох болжээ.
Тодруулбал, баасан гарагт Япон улсын засгийн газраас баталснаар тэд ОХУ руу хөдөлгүүрийн эзлэхүүн 1.9 литрээс дээш хэмжээтэй болон цахилгаан, бензин хосолмол хөдөлгүүртэй автомашиныг экспортлохыг хориглосон байна. Энэ тухай мэдээллийг Японы Эдийн засаг, Худалдаа, Аж үйлдвэрийн сайд Нишимура Ясутоши хэвлэлийнхэнд танилцуулжээ.
Мөн тэд ОХУ руу ачааны машины дугуй экспортлохыг хориглосон байна.
Ноён Ясутошигийн хэлснээр хориг ирэх сарын 9-ий өдрөөс эхлэн хүчин төгөлдөр үйлчилнэ гэжээ.
Эх сурвалж: ТАСС