Франс Пресс болон Ройтерс агентлагуудын орон нутгийн цагаар 7-ны өдөр мэдээлснээр, ОХУ хагас зуун жилийн дараа анх удаа сарыг судлах томоохон хэмжээний төслөө хэрэгжүүлж эхлэхээр болж буй талаар онцолжээ.
Тодруулбал ОХУ-ын сансар судлалын агентлаг болох Роскосмосын зүгээс мэдэгдэхдээ “Луна-25” сарны судалгааны автомат станцыг хөөргөх "Союз" пуужинг ирэх 11-ний өдөр угсарч дуусгана хэмээн цохон тэмдэглэсэн байна.
Ингэснээр тус улс нь 1976 оноос хойш буюу сүүлийн 47 жилийн хугацаанд анх удаа сарыг судлах гэж буй хэрэг бөгөөд “Луна-25” станцыг Москва хотоос зүүн тийш 5550 километр зайд орших Алс Дорнод дахь Восточный сансрын баазаас хөөргөхөөр төлөвлөж байгаа аж.
"Луна-25" нь сарны өмнөд туйлд хүрэх анхны станц болно хэмээн Роскосмос мэдэгдэв.
Тус станцын үндсэн зорилго нь зөөлөн буух технологийг хөгжүүлэх, сарны дотоод бүтцээс гадна усны нөөцийг судлах явдал бөгөөд газардсаны дараа сарны гадаргуу дээр нэг жилийн хугацаанд идэвхтэй үйл ажиллагаа явуулах гэнэ.
Эх сурвалж: MBC