Их Британи улс орон нутгийн цагаар 8-ны өдөр Ираны нисгэгчгүй нисэх төхөөрөмж үйлдвэрлэгч зэрэг ОХУ-ын батлан хамгаалах салбарын 25 ханган нийлүүлэгчийн эсрэг хориг арга хэмжээ авахаар шийдсэнээ зарлав.
Тодруулбал тус улсын засгийн газар Иран, Турк, Беларусь, Словак, Швейцарь, Арабын Нэгдсэн Эмират улс (АНЭУ) болон ОХУ-ын хувь хүн, аж ахуй нэгжийн эсрэг шинэ хориг арга хэмжээ авч байгаагаа мэдэгдсэн байна.
Их Британийн Гадаад хэргийн сайд Жеймс Клеверли "Энэ удаагийн хориг арга хэмжээний гол зорилго бол Оросын зэвсгийн нөөцийг бүрдүүлж буй этгээдүүдийн үйл ажиллагааг хумиж, Путины батлан хамгаалах салбарын нийлүүлэлтийн сүлжээг тасалдуулахад оршиж байгаа” хэмээн цохон тэмдэглэжээ.
Их Британийн засгийн газар Украинд дайн дэгдсэнээс хойш 1600 гаруй хувь хүн, аж ахуйн нэгжийн эсрэг хориг арга хэмжээ аваад байгаа билээ.
Эх сурвалж: MBC