Хятадын хэвлэл мэдээллийн хэрэгслүүдийн онцолж буйгаар энэ онд тус улсын автомашины экспорт 5 саяд ойртсон үзүүлэлтээрээ Японыг анх удаа ардаа орхин, дэлхийд тэргүүлэх төлөвтэй байгаа талаар мэдээлэв.

Тодруулбал Хятадын автомашин үйлдвэрлэгчдийн нийгэмлэгийн мэдээлснээр, энэ оны 1-р сараас 10-р сар хүртэлх хугацаанд Хятадын автомашины нийт экспортын хэмжээ 3 сая 922 мянгад хүрсэн нь өнгөрсөн оны мөн үетэй харьцуулахад 59.7 хувиар өссөн үзүүлэлт болохыг дурджээ.

Харин үлдсэн хоёр сарын экспорт өмнөх сарынхаас 9.8 хувиар өсөж 488 мянгад хүрсэн 10-р сарын түвшинд хадгалагдаж чадвал энэ оны нийт экспортын хэмжээ 4.9 сая болох юм. Цаашлаад уг үзүүлэлт дээр шинэ эрчим хүчний автомашины экспортын хэмжээг нэмж тооцвол энэ тоо 5 саяыг давах төлөвтэй байна.

Хэрвээ энэхүү таамаглал биеллээ олсон тохиолдолд Хятад улс Японыг ардаа орхин, түүхэндээ анх удаа автомашины жилийн экспортын хэмжээгээрээ дэлхийд тэргүүлэх боломж бүрдэх талаар орон нутгийн хэвлэл мэдээллийн хэрэгслүүд цохон тэмдэглэв.

Оны эхний хагасын байдлаар, Хятад улс аль хэдийн 2 сая 140 мянган ширхэг автомашин экспортолсон нь өнгөрсөн оны мөн үеийнхээс 76 хувиар нэмэгдсэн үзүүлэлт болсон аж. Гэтэл мөн хугацаанд автомашины экспортоор дэлхийд тэргүүлэгч Япон улсын хувьд ердөө 2 сая 20 мянган автомашин экспортолсон үзүүлэлтээрээ Хятад улсын доор бичигдээд байгаа билээ.

Эх сурвалж: YTN