Украины ерөнхийлөгч Володимир Зеленський Нидерланд болон Дани улсаас “F-16” сөнөөгч онгоц хүлээн авахаар болжээ.

Тодруулбал ерөнхийлөгч Зеленський Нидерландад айлчилж, ерөнхий сайд Марк Рюттетэй уулзсаныхаа дараахан хийсэн хэвлэлийн бага хурал дээр “F-16” сөнөөгч онгоцыг шилжүүлэх тохиролцоонд хүрсэн хэмээн мэдэгдсэн байна.

Ингэснээр одоогийн байдлаар 11 улс оролцож буй нисгэгч бэлтгэх сургалт дуусмагц “F-16” сөнөөгч онгоцнуудыг Украины Агаарын цэргийн хүчинд хүлээлгэн өгөхөөр болжээ.

Нисгэгч бэлтгэх тус сургалт хамгийн богинодоо хагас жилийн хугацаанд үргэлжилнэ хэмээн тооцвол ирэх оны эхээр сөнөөгч онгоцыг хүлээлгэн өгөх төлөвтэй байгаа юм.

Ерөнхийлөгч Зеленський Нидерландад айлчилсныхаа дараа мөн Дани улсад айлчилж, “F-16” сөнөөгч онгоцны дэмжлэг авахаар болсон гэдгээ хамтарсан мэдэгдэлээр дамжуулан олон нийтэд мэдээлэв.

Эх сурвалж: YTN