Даваа гарагт CNBC агентлагаас мэдээлснээр Американ Эйрлайнс авиакомпани нисгэгчдийнхээ цалинг нэмэхээр шийдвэрлэжээ. Ингэснээр тэд АНУ-ын авиакомпаниудын хүрээнд нисгэгчдийнхээ цалинг нэмэхээр шийдвэрлэсэн хоёр дахь авиакомпани болсон байна.

Тийнхүү шийдвэрийн хүрээнд Американ Эйрлайнс авиакомпани 15,000 гаруй нисгэгчийнхээ цалинг даруй 21 хувиар нэмэх болсон бөгөөд 2024 онд цалинг 5 хувиар нэмж, 2025 онд 4 хувиар, 2026 онд 4 хувиар, 2027 онд 3 хувиар тус тус нэмэх болжээ.

Үйл явдлын хүрээнд Американ Эйрлайнс авиакомпанитай хэлэлцээр хийсэн Allied Pilots Association үйлдвэрчний эвлэлээс мэдэгдсэнээр, нисгэгчид санал хураалтад нийт 95 хувийн ирцтэй оролцож, 75 хувь нь уг тохиролцоог зөвшөөрсөн санал өгсөн гэнэ. Мөн цалинг нэмэхээс гадна авиакомпанийн зүгээс нисгэгчдийнхээ ажлын цагийн хуваарь, урамшуулал, хөнгөлөлтийг сайжруулахаа амласан байна.

Эх сурвалж: CNBC