Лхагва гарагт электрон тамхины Juul Labs компани зардлаа танаж, орлогоо нэмэгдүүлэх үүднээс ажиллах хүчээ 30 хувиар бууруулахаар төлөвлөж байгаагаа мэдэгджээ.
Тус компанийн хэвлэлийн төлөөлөгчийн хэлснээр тэдний нийт ажиллах хүчний 30 хувь гэдэг 250 орчим хүнтэй тэнцэнэ гэсэн юм. Улмаар төлөвлөгөөт орон тооны цомхотголыг хийсэн хойно тус компанийн нийт ажилтны тоо 650 орчим болох ажээ.
CNBC сувгаас мэдээлснээр уг төлөвлөгөө нь Juul компанийн үйл ажиллагааны зардлыг даруй 225 сая ам.доллароор бууруулна гэсэн байна.
Juul компанийн хувьд өнгөрөгч онд АНУ-ын Хүнс, эмийн бүтээгдэхүүний удирдах газраас гаргасан шийдвэрийн дагуу бүх бүтээгдэхүүнээ зах зээлээс татсан ч төд удалгүй тус шийдвэрийг тодорхойгүй хугацаанд цуцлуулж чадсан юм. Өдгөө тэд тус байгууллагын шийдвэрийг хүлээж байгаа бөгөөд эцсийн шийдвэр гарах хүртэл хөрөнгө оруулагчдаас хангалттай хөрөнгө төвлөрүүлж, зардлаа танахаар хичээж байгаа нь энэ ажээ.
Эх сурвалж: CNBC