АНУ-ын амьтны хүрээлэнд ямар ч толбогүй, цулгуй шаргал өнгөтэй анаашны тугал мэндэлжээ.

Британийн өдөр тутмын The Guardian сонины орон нутгийн цагаар 21-ний өдөр мэдээлснээр, энэхүү анаашны тугал өнгөрсөн сарын 31-ний өдөр АНУ-ын Теннесси мужийн “Brights Zoo” амьтны хүрээлэнд мэндэлсэн бөгөөд ямар ч толбогүй байсан нь олны анхаарлыг татсан юм. Уг тугал төрөх үедээ 6 фут буюу 183 сантиметр өндөртэй байжээ.

Амьтны хүрээлэнгийнхэн түүнийг “Дэлхий дээрх цорын ганц толбогүй анааш” хэмээн онцлон тэмдэглэсэн байна.

Энгийн анаашны бие дээр байдаг толбо нь биеийг өнгөлөн далдлах зорилготойн дээр толбоны доорх арьс нь дулааныг гадагшлуулах, зохицуулах үүрэг гүйцэтгэдэг аж.

“Анааш бүр дахин давтагдашгүй хээтэй төрдөг бөгөөд энэ нь эхийнхээ удамшлын хүчин зүйлээс хамаардаг” хэмээн мэргэжилтнүүд үздэг байна.

Тус амьтны хүрээлэнгийн үүсгэн байгуулагч Тони Брайт орон нутгийн хэвлэлд өгсөн ярилцлагадаа "Толбогүй анаашны тугалны тухай мэдээлэл дэлхий нийтийн чихэнд хүрсний “ачаар” анаашыг хамгаалах асуудал олны анхаарлын төвд орсонд туйлын баяртай байна” хэмээн сэтгэгдлээ илэрхийлжээ.

Үүний зэрэгцээ амьтны хүрээлэнгийн зүгээс тус өвөрмөц содон бяцхан амьтанд ямар нэр өгөх талаарх санал хураалтыг явуулж байгаа бөгөөд суахили хэлээр "өвөрмөц" гэсэн утгатай "кипеки" гэх нэр хамгийн олон саналыг аваад байгаа аж.

Эх сурвалж: JoongAng