Гадаадын томоохон хэвлэл мэдээллийн хэрэгслүүд оюуны өмчийн эрхийг хамгаалах үүднээс хиймэл оюун ухаан дээр суурилсан технологи болох ChatGPT-нээс татгалзаж эхэлжээ.

CNN сувгийн орон нутгийн цагаар 28-ны өдөр мэдээлснээр “Disney, The New York Times, CNN зэрэг томоохон хэвлэл мэдээллийн компаниуд хиймэл оюун ухаанд суурилсан технологитой хүйтэн дайн зарлаж ChatGPT-ийн хандалтыг хааж эхэлсэн” хэмээн онцлов.

Эдгээр хэвлэл мэдээллийн агентлагууд нь өөрсдийн бэлтгэдэг контентуудыг хамгаалахын зэрэгцээ ChatGPT технологи нь хэвлэл мэдээллийн салбарт томоохон эрсдэл учруулж болзошгүй хэмээн үзэж буй аж. CNN сувгийн мэдээлснээр New York Times, Reuters, Disney, ABC зэрэг мэдээллийн хэрэгслүүд OpenAI oкомпанийн мэдээлэл цуглуулах программ хангамж буюу вэб мөлхөгч болох GPTbot-ыг хаах кодыг өөрсдийн вэбсайтдаа суулгаж байгаа талаар дурдсан байна. Учир нь тус компани хэвлэл мэдээллийн салбарынхантай оюуны өмчийн эрхийг ашиглах талаар ямар нэгэн зөвшилцөлийг хараахан хийгээгүй байгаатай холбоотой аж.

2000 орчим хэвлэл мэдээллийн компанийг төлөөлдөг News Media Alliance-ын тэргүүн Даниел Коффи хэлэхдээ “OpenAI зэрэг хиймэл оюун ухааны технологийг хөгжүүлэгч компаниуд нь хэвлэл мэдээллийн салбарт хохирол учруулж магадгүй хэмээн тус салбарынхан санаа зовницгоож байна” хэмээн цохон тэмдэглэсэн байна.

Эх сурвалж: Maeil