Өнгөрөгч онд тэрбумтан Илон Маск Твиттер платформыг худалдан авсан билээ. Түүнээс хойш тэр компанийн үйл ажиллагаа, дотоод бүтцийн хүрээнд ихээхэн өөрчлөлт оруулсан. Үүнээс нэг том жишээ нь Илон Маск Твиттер платформд ре-брэндинг хийж, нэрээс нь өгсүүлээд логог нь хүртэл сольсон юм. Тэгвэл баасан гарагт BBC сувгаас мэдээлснээр тус платформ хүний нөөцийн салбарт хөл тавьж магадгүй нь гэжээ.
Тодруулбал, BBC сувгаас мэдээлсэн дагуу, шинэчлэгдсэн нууцлалын бодлогын хүрээнд тэд хүмүүсийн биометр мэдээллийг цуглуулах бөгөөд боловсрол, хөдөлмөр эрхэлж буй байдлын мэдээллийг ч цуглуулж магадгүй гэнэ.
Улмаар X Premium үйлчилгээг авдаг хүмүүс өөрийн хаягийг зураг эсхүл иргэний үнэмлэхээрээ баталгаажуулах ба X платформын зүгээс хөдөлмөр зуучийн үйлчилгээг санал болгох юм. Шинэ бодлого ирэх 29-ийн өдрөөс мөрдөгдөж эхлэх ажээ.
Ташрамд дурдахад тэрбумтан Илон Маск өнгөрөгч тавдугаар сард Laskie гэх хүний нөөцийн чиглэлд үйл ажиллагаа явуулдаг компанийг худалдан авсан гэжээ.
Эх сурвалж: BBC