Индонезийн засгийн газар ирэх жилээс Бали арлыг зорин ирэх гадаадын жуулчдаас 10 ам.долларын аялал жуулчлалын татварыг авахаар болжээ.

Индонезийн Decik News сонины 13-ны өдрийн мэдээлснээр, Бали арлын амбан захирагч Ваян Костер тус арлын соёл, байгаль орчныг хамгаалахын тулд гадаадын жуулчдаас 150,000 рупи буюу 10 ам.долларын аялал жуулчлалын татвар ирэх жилээс авахаар төлөвлөж байгаа хэмээн дурдсаныг онцлов.

Энэхүү татварыг хилийн чанадаас болон Индонезийн бусад хэсгээс Бали арлыг зорин ирж буй гадаадын жуулчдаас нисэх онгоцны буудал болон бусад боомтууд дээрээс авах бөгөөд Индонезчүүдэд хамаарахгүй аж.

Бали арлын засаг захиргаа уг татвараас олсон орлогыг Бали дахь аялал жуулчлалын дэд бүтцийг хөгжүүлэхэд зарцуулахаар төлөвлөж байгаагаа мөн энэ үеэр мэдэгдэв.

Индонезийн хамгийн том аялал жуулчлалын бүс болох Бали арлыг зорих жуулчдын тоо өнгөрсөн жилээс эрс нэмэгдсэн ба өнгөрсөн жил л гэхэд 2 сая гаруй жуулчин хүлээн авчээ. Харин энэ жил Балид 5 сая орчим жуулчин ирнэ гэх тооцоо бий.

Гэвч жуулчдын тоо нэмэгдэхийн хэрээр хог хаягдал нэмэгдэж, дэд бүтцийн байгууламжуудын хүртээмж муудаж байгаа тул ийнхүү аялал жуулчлалын татварыг хэрэгжүүлэхээр болж буй нь энэ аж.

Бали арлын захиргааны зүгээс аялал жуулчлалын татварыг 30-100 ам.доллар байхаар хэлэлцэж байна гэж орон нутгийн хэвлэл мэдээллийн хэрэгслээр өмнө нь мэдээлж байсантай харьцуулахад энэ нь тун боломжийн зохицуулалт болсныг дурдах нь зүйтэй.

Аялал жуулчлалын татварыг ногдуулахаар болсон явдал нь жуулчдын тоог бууруулна гэж болгоомжилж буй талаар амбан захирагч Костероос асуухад “Аялал жуулчлалын татварыг Бали арлын соёл, байгаль орчиныг хамгаалахад ашиглах тул илүү сайн дэд бүтцийг бий болгоход тусална” хэмээн цохон тэмдэглэсэн байна.

Эх сурвалж: YTN