Пүрэв гарагт Оросын Төв банкны ерөнхийлөгч Эльвира Набиуллина энэ онд багтаан бодлогын хүүгээ дахин өсгөж магадгүй гэдгийг мэдэгджээ.
Түүний хэлснээр, “Бодлогын хүүг бид энэ онд багтаан дахин нэг удаа өсгөж магадгүй ч ерөнхийлбөл, энэ онд бодлогын хүү одоо байгаа түвшнээсээ нэг их өсөхгүй. Харин инфляц бууж эхлэхэд бид ирэх жилээс бодлогын хүүгээ эргүүлэн буулгах болно” гэжээ.
Эльвира Набиуллинаг тийн мэдэгдэхээс өмнө албаныхны хэлснээр ОХУ дахь инфляц ирэх оноос бууж эхэлнэ гэсэн юм.
ОХУ-ын Төв банкны хувьд өнгөрөгч аравдугаар сард хуралдахдаа бодлогын хүүгээ 2 бүхэл нэгжээр нэмэгдүүлж, 15 хувьд хүргэсэн билээ.
Эх сурвалж: ТАСС