Энэтхэг улс будааны экспортдоо хориг тавьж, Украин дахь дайн үргэлжилж буй энэ цаг үед олон улсад будаа болоод буудайн үнэ өсөх болжээ.

Тодруулбал, Энэтхэг улс басмати төрлийн будаанаас бусад будааг экспортлохыг хориглосноор бангкок будааны үнэ л гэхэд нэг тонн нь 607.50 ам.доллар хүрэх болсон байна. Энэ нь бангкок будааны үнийн хувьд 2012 оны тавдугаар сараас хойш тогтсон хамгийн өндөр үзүүлэлт ажээ.

Nikkei Asia сувгаас мэдээлж байгаагаар дэлхийн цаг агаарын нөхцөл байдал энэ хэвээрээ муудвал 2023-24 оны тариалангийн жилд ургац ердөө 170.42 сая тоннд хүрч буурна гэсэн юм. Улмаар ургац муудах нь олон улсын будаа, буудайн үнэд шууд нөлөөлж, одоо байгаагаас ч өндөр үнээр худалдаалагдах билээ.

Мөн Nikkei Asia сувгаас мэдээлснээр нөхцөл байдал энэ эрчээрээ дордвол, Япон улсын эдийн засагт ч том цохилт болно гэсэн байна. Учир нь Япон улсын засгийн газар жилд ойролцоогоор 770,000 тонн будаа импортолдог бөгөөд үүний 400,000 орчим тонн нь Тайланд улсаас орж ирдэг юм.

Эх сурвалж: Nikkei Asia