Баасан гарагт Украины хэвлэл мэдээллийн NV хуудаснаас мэдээлснээр өнгөрөгч нэг жилийн хугацаанд Украин дахь ам.долларын тэрбумтнуудын тоо 9 байснаас 2 болж цөөрчээ.

Тэдний хийсэн судалгаагаар Украин дахь ам.долларын тэрбумтнуудын жагсаалтад Ринат Ахметов болон Виктор Пинчук нар л тунаж үлдсэн байна. Тодруулбал, Ринат Ахметовын нийт хөрөнгө 6.59 тэрбум ам.доллароор хэмжигдэж байгаа бол Виктор Пинчукийн нийт хөрөнгө 1.72 тэрбум ам.доллароор хэмжигдэж байгаа ажээ. Гэвч тэрбумтнууд хэдий өөрсдийн байр суурийг алдаагүй ч ноён Ахметов нийт хөрөнгийн үнэлгээнийхээ 43 хувийг алдсан бол ноён Пинчук 34 хувийг алдсан байна.

Улмаар бусад ам.долларын тэрбумтан асан хүмүүсийн хөрөнгийн үнэлгээ даруй 10-124 хувиар буурчээ.

Тэдний мэдээлснээс үзвэл, Украины хамгийн баян хүмүүст тооцогддог байсан Пётр болон Алексей Порошенко нарын нийт хөрөнгийн үнэлгээ 37 хувиар унаж, 954 сая ам.долларт хүрсэн бол Галина болон Александер Герега нарын нийт хөрөнгийн үнэлгээ 38 хувиар унаж, 907 сая ам.долларт хүрсэн байна. Харин Украины тэрбумтнууд дундаас хамгийн их алдагдал хүлээсэн нь Алексей Шевченко болон Максим Литвин нар байсан юм. Тэдний нийт хөрөнгө 124 хувиар буурчээ.

Эх сурвалж: ТАСС