Өнгөрөгч долоо хоногийн баасан гарагт хиймэл оюун ухаан бүхий ChatGPT чатботыг хөгжүүлэгч OpenAI компанийн ТУЗ тус компанийг үүсгэн байгуулагч, гүйцэтгэх захирал Сэм Альтманыг албан тушаалаас нь түдгэлзүүлсэн билээ.
Улмаар ноён Альтман Microsoft компанид ажиллах санал хүлээн авсан бол OpenAI компанийн ажилтнууд ТУЗ-өө огцрохыг шаардаж, ажлаа хүлээлгэн өгөхөөр сүрдүүлж, нөгөө талд тус компанийн хөрөнгө оруулагчид ч ноён Альтманыг албан тушаалд нь эргүүлэн томилохгүй болбоос тэднийг шүүхэд өгөхөө мэдэгдсэн юм.
Тэгвэл мягмар гарагт BBC сувгаас мэдээлснээр OpenAI компанийн удирдлагууд Сэм Альтманыг албан тушаалд нь эргүүлэн томилох боломжийг судалж байна гэжээ.
Эх сурвалжуудын мэдээлж байгаагаар өдгөө эл асуудал зөвшилцөл, хэлэлцээрийн шатандаа явж байгаа бөгөөд ноён Альтманыг төлөөлж Сэм Альтман өөрөө хэлэлцээр хийж байгаа бол OpenAI компанийг төлөөлж, тус компанийн ТУЗ-ийн дор хаяж нэг гишүүн хэлэлцээр хийж байгаа гэнэ.
Одоогоор хэлэлцээрийн үр дүн тодорхойгүй байгаа ч бидний зүгээс үйл явдлын хүрээнд цаг алдалгүй мэдээлэх болно.
Эх сурвалж: BBC