Мягмар гарагт криптовалютын хамгийн том бирж Binance-ийн гүйцэтгэх захирал Жао Чанпен албан тушаалаасаа огцорсон билээ. Тэгвэл лхагва гарагт BBC сувгаас мэдээлснээр түүний албан тушаалыг Тенг Ричард гэх эрхэм хүлээн авах болжээ.

Сингапур улсын иргэн ноён Тенгийн хувьд хоёр жилийн өмнө Binance компанид нэгдэж, тус биржийн Сингапур дахь үйл ажиллагааг хариуцсан гүйцэтгэх захирлаар ажиллаж байсан нэгэн юм. Гэхдээ тэр тус албан тушаалдаа нэг их удаагүй бөгөөд 2023 оны дөрөвдүгээр сард биржийн Европ, Ази, Ойрхи Дорнод, Хойд Америкийн үйл ажиллагааг хариуцсан бүсийн захирлаар томилогдож байжээ. Тэгвэл Тенг Ричард уг албан тушаалаа хүлээн авснаас хойш ердөө 7 сарын дотор биржийн гүйцэтгэх захирал болсон байна.

BBC сувгаас мэдээлснээр ноён Тенг нь Сингапурын Мөнгөний хэрэг эрхлэх газар, Сингапурын Бирж, Абу Дабигийн Глобал Зах Зээл гэх байгууллага зэрэгт ажиллаж байсан туршлагатай нэгэн ажээ.

Эх сурвалж: BBC