Мягмар гарагт BBC сувгаас мэдээлснээр Украины тагнуулын албаны дарга Дэслэгч генерал Кирило Будановын эхнэрийг хүнд металлаар хордуулсан хэрэг гарчээ.
Эх сурвалжийн мэдээлснээр Марианна Буданова нь урт хугацаанд биеийн байдал таагүй байснаас үүдэн эмнэлэгт хүргэгдсэн гэсэн юм.
Гэвч үйл явдлын хүрээнд Украины цэргийн тагнуулын газраас мэдэгдэл хийхээс татгалзжээ.
Одоогийн байдлаар эл хэргийн ард ОХУ байсан эсэхийг эх сурвалжууд тодруулж чадаагүй байгаа юм.
Харин Украины Үнэн сониноос мэдээлснээр хэрэгтнүүд Марианна Будановагаас гадна Украины тагнуулын албаны хэд хэдэн алба хаагчийг хордуулсан гэжээ. Тийнхүү нэгэн эх сурвалжийн мэдээлснээр хатагтай Буданова өдгөө цогц эмчилгээ хийлгэж байгаа бөгөөд эмч нарын хяналтад байгаа гэсэн байна.
Эх сурвалж: BBC