Ням гарагт Их Британийн DailyMail цахим сэтгүүлээс мэдээлснээр АстраЗенека вакциныг хийлгэсэн 35 хүн вакцинаас үүдэн эрүүл мэндийн хувьд хохирсон хэмээж, вакциныг үйлдвэрлэгчдээс их хэмжээний нөхөн төлбөр нэхэмжилжээ. Улмаар талууд Дээд шатны шүүхээр маргаанаа шийдвэрлүүлэх болсон байна.
Хохирогчдын хэлж байгаагаар тэд вакциныг хийлгэснээс болж “Вакцинаар үүсгэгдсэн дархлалын тромбоцитопени ба тромбоз” гэх цус бүлэгнүүлдэг эмгэгтэй болсон юм. Эл эмгэгээс үүдэн дор хаяж 81 хүн нас барсан бөгөөд олон зуун хүн тодорхой хэмжээгээр өвчин зовуурьтай болсон ажээ.
Улмаар дээд шатны шүүх хуралд АстраЗенека вакцины үйлдвэрлэгчид ялагдал хүлээх аваас тэд нийт 80 сая ам.долларын нөхөн төлбөрийг төлж барагдуулах үүрэг хүлээх гэнэ. Мөн Их Британийн Вакцины хохирлыг барагдуулах схемийн дагуу хэрэв нэхэмжлэгч тал ялалт байгуулбал засгийн газраас нэг удаадаа 120,000 фунт стерлинг авах боломжтой болох юм.
Эх сурвалж: Daily Mail