АНУ-ын ерөнхийлөгч Жо Байдены засаг захиргаа Украинтай дайтаж байгаа ОХУ-д олон зуун баллистик пуужин нийлүүлсэн гэх Иран улсын эсрэг нэмэлт хориг арга хэмжээ авахаар төлөвлөж байгаагаа зарлав.
Орон нутгийн цагаар 22-ны өдөр Цагаан ордны Үндэсний аюулгүй байдлын зөвлөлийн стратегийн харилцаа холбооны зохицуулагч Жон Кирби "Бид ойрын хугацаанд Ираны эсрэг нэмэлт хориг арга хэмжээ авна" гэжээ.
Тэрээр "Бид энэ асуудлыг НҮБ-ын Аюулгүйн зөвлөлд оруулах болно. Олон улсын хамтын нийгэмлэгийн хариу арга хэмжээ хурдан бөгөөд хатуу байх болно гэдгийг батлан харуулна” хэмээн нэмж хэлэв. Үргэлжлүүлэн “Бид Ираны эсрэг нэмэлт хориг арга хэмжээ аваад тогтохгүй Европ болон бусад бүс нутаг дахь холбоотнууд болон түншүүдтэйгээ хариу арга хэмжээ авах нэмэлт хувилбаруудыг ч хэлэлцэх болно” хэмээн цохон тэмдэглэв.
Иран улс өнгөрсөн сарын эхэн үеэс эхлэн Орос руу 400 орчим “газар-газар” ангиллын баллистик пуужин илгээсэн талаар бид мэдээлсэн билээ. Эдгээр пуужингийн ихэнх нь "Золфагар" шиг "Фатех-110" цувралын баллистик пуужингууд байсныг гадаадын хэвлэлүүд онцолсон юм.
Эх сурвалж: Asiae