АНУ, Их Британи улсууд өчигдөр Йемений баруун нутаг дахь хути босогчдын “Ансар Аллах” хөдөлгөөний байгууламжуудад бөөн хүчээр цохилт өгчээ. Энэ тухай босогчдын эзэмшлийн “Аль-Масира” телевиз мэдээлжээ.

Тус сувгаар мэдээлснээр, эвслийн хүчнийхэн Эль-Ходейда мужийн нутагт 17 удаа агаарын цохилт өгсөн байна. Цохилтод мөн мужийн засаг захиргааны төв, хэд хэдэн суурин, мөн Улаан тэнгисийн эрэгт орших Рас-Иса боомт өртжээ. АНУ, Их Британийн цэргийн онгоцууд мөн Саад муж дахь хутичуудын байгууламжуудад доод тал нь таван удаа цохилт өгсөн байна.

2014 онд иргэний дайн эхэлснээс хойш хутичуудыг эсэргүүцсээр байгаа, олон улсад хүлээн зөвшөөрөгдсөн Йемений засгийн газрын төлөөлөгч Ройтерс агентлагт мэдээлснээр, даваа гарагт өгсөн цохилтын улмаас 11 хүн амиа алдаж, 14 хүн шархаджээ. Тэрбээр хутичуудын хохирлын талаар мэдээлэл өгөөгүй байна.

Хутичуудын хяналтад байдаг Йемений бүс нутагт даваа гарагт өгсөн цохилт нь АНУ, Их Британи улсууд тэдний байрлалуудад нэгдүгээр сарын 12-ноос цохилт өгч эхэлснээс хойших хамгийн ширүүн цохилтуудын нэг болсон гэж “Аль-Масира” суваг мэдээлжээ. Хутичууд худалдааны хөлөг онгоц руу халдаж, улмаар энгийн иргэд амиа алдсан алдсан анхны тохиолдол гарснаас хэд хоногийн дараа Йемений баруун нутагт цохилт өгсөн байна.

Гуравдугаар сарын 6-нд хутичууд Адены буланд Барбадос улсын далбаан дор явж байсан ачааны хөлөг онгоц руу халджээ. Онгоцонд гал гарч эхлэхэд багийнхан хөлөг онгоцыг орхихоос өөр аргагүй болсон байна. АНУ-ын Зэвсэгт хүчний Төв командлалын мэдээлснээр, уг халдлагын улмаас багийн гурван гишүүн амь үрэгджээ.

Эх сурвалж: ТАСС /МОНЦАМЭ агентлаг/