БНХАУ өнгөрсөн долоо хоногт Тайванийг дэмжихтэй холбоотой ямар ямар үйлдлийг гэмт хэрэгт тооцохоо, мөн тэдгээр хэргүүдийн зарим нь цаазын ялтай талаар жагсаалт танилцуулсан билээ.

Улмаар тус улсын дээд шүүх, прокурорууд болон гурван яам хамтран Хятадын бүх түвшний шүүх, прокурорууд Тайванийн тусгаар тогтнолыг дэмжигчдийг хатуу шийтгэхээ мэдэгдсэн байна.

Гэмт хэрэгт тооцогдон шийтгэл хүлээх үйлдлүүдээс жишээ татвал, “Хоёр Хятад”, “Нэг Хятад, нэг Тайвань” зэрэг бодлогыг сурталчлах, байгууллага зохион байгуулж, Тайванийн тусгаар тогтнолын төлөө ажиллах, Тайванийн тусгаар тогтнолыг дэмжигч гадаадын байгууллагатай хамтрах зэрэг оржээ.

Мөн боловсрол, соёл, түүх, мэдээ, медиа салбарт Тайвань бол Хятадын нэг хэсэг гэх санааг үгүйсгэх нь нэлээд хүнд гэмт хэрэгт тооцогдох аж.

Ихэнх гэмт гэх хэрэгт 10 жил хүртэл хорих ял ноогдуулах агаад бусдыг зохион байгуулж, байгууллагаараа Тайванийг дэмжсэн хүмүүст дээрх хязгаар хамаарахгүй, цаашлаад “ноцтой” хэмээн үзвэл цаазаар авах хүртэл ялтай гэнэ.

Эх сурвалж: Business Insider