![](c/2407/FE-SIIPXBN-57QPLKY-NPR5NPN-8D.jpg)
Японы хөдөлмөр эрхлэгчдийн бодит цалин өнгөрсөн оны мөн үетэй харьцуулахад буурсан гэх дүн мэдээ гарчээ. Ингэснээр 26 сар дараалан буураад байгаа юм.
Японы Эрүүл мэнд, хөдөлмөр, нийгмийн халамжийн яамнаас 8-ны өдөр нийтэлсэн "5-р сарын хөдөлмөрийн статистикийн судалгаа"-наас харахад тав ба түүнээс дээш ажилтантай албан байгууллага, компаниудын нэг ажилчинд ногдох сарын дундаж цалин 297.151 иен байсан нь өмнөх оны мөн үетэй харьцуулахад 1.9 хувиар өссөн үзүүлэлт болжээ.
Гэвч бараа бүтээгдэхүүн, үйлчилгээний үнийн өсөлттэй харьцуулахад бодит цалин 1.4 хувиар буурсан гэх тооцоо гарсан байна. Ийнхүү бодит цалингийн хэмжээ түүхэнд байгаагүй урт хугацаагаар буюу 26 сарын турш тасралтгүй буураад буй юм. Nihon Keizai Shimbun сонины зүгээс бодит цалингийн бууралтын хувь хэмжээ бага багаар багасаж байна гэж тайлбарласан байна.
Эрүүл мэнд, Хөдөлмөр, нийгмийн хамгааллын яамнаас “Хэдийгээр албан байгууллага, компаниуд цалин нэмэгдүүлэх тал дээр ихээхэн анхаарч байгаа ч үнийн өсөлт маш хүчтэй байгаагийн улмаас бодит цалин тасралтгүй буурахад нөлөөлөх гол хүчин зүйл болж байна” хэмээн тайлбарлав.
Эх сурвалж: Asiae