Парис хотноо болж буй 33 дахь удаагийн Олимпын тоглолтын аварга Елдос Сметов болон түүний дасгалжуулагчид орон сууц ба автомашины түлхүүр гардуулах ёслолын ажиллагаа Жамбыл мужийн төв Тараз хотод өнөөдөр боллоо.

Олимпын аваргад хүндэтгэл үзүүлэхээр хуран цугларсан Жамбыл мужийн 15 мянга орчим иргэдэд Е.Сметовын спортын замналыг харуулсан дүрс бичлэгийг үзүүлэв.

Ёслолын ажиллагааг нээж Жамбыл мужийн аким /захирагч/ Ербол Карашукеев баяр хүргэн үг хэлэхдээ, Парисын Олимпын оргилд гарч чадсан Е.Сметов ба түүний дасгалжуулагчид гүн хүндэтгэлээ илэрхийллээ. “Казахын ард түмний хүү Е.Сметов тусгаар тогтносон Казахстан улсын түүхэнд жүдогоор анхны Олимпын аварга боллоо. Алдарт тамирчин Жаксылык Ушкемпировоос хойш 44 жилийн дараа Е.Сметов казахстанчуудын мөрөөдлийг биелүүллээ” хэмээн мужийн захирагч онцлон дурдав.

Тэрбээр Олимпын аваргад хотын захиргааны өмнөөс өгч буй бэлэг дурсгалын зүйлс, ивээн тэтгэгчдээс бэлэглэж буй 5 өрөө пентхаус ба сүүлийн үеийн загварын Lexus 600 автомашины түлхүүрүүдийг Олимпын аваргад гардуулан өгөв. Мөн түүний дасгалжуулагч Галымжан Жылгелдиевт 2 өрөө орон сууц ба Hyundai Santa Fe автомашины түлхүүрийг гардууллаа.

“Би хүүхэд байхдаа төрийнхөө далбааг мандуулж, төрийн дууллаа эгшиглүүлэхийг мөрөөддөг байсан. Мөрөөдөлдөө хүрэхийн тулд цуцалтгүй хөдөлмөрлөлөө. Жаксылык Ушкемпировын мөрөөдлийг биелүүлсэндээ баяртай байна. Хөгжөөн дэмжигчид та бүхэндээ баярлалаа, би та бүхнийхээ дэмжлэгийг үргэлж мэдэрч байсан шүү” гэж Е.Сметов нутгийнхандаа хандан хэлэв.

Эх сурвалж: МОНЦАМЭ