2006 онд Adidas Nike брендтэй өрсөлдөх өрсөлдөөндөө нэмэр болгох үүднээс Reebok-ийг 3.6 тэрбумаар худалдан авч байсан ч Reebok бренд зах зээлд тааруухан үзүүлэлт үзүүлж, улмаар хөрөнгө оруулагчид тус брендийг эргүүлэн зарахыг шаардсаар байсан юм. Тийнхүү тэдний шаардлага энэ онд биелж, Adidas Reebok-ийг 2.1 тэрбум еврогоор зарах болжээ.

Reebok-ийг худалдан авсан компанийн мэдэгдэж байгаагаар тус компани Reebok-ийн удирдлагыг Бостонд үлдээх бөгөөд үйл ажиллагаа нь Хойд Америк, Латин Америк, Ази-Номхон далайн бүс, Европ, ОХУ-д хэвээр үргэлжлэх гэнэ.

Өнгөрөгч 11 жилийн хугацаанд тус компани нийт 30 гаруй дампуурсан брендийг худалдан авсан бөгөөд тэдгээрийн дунд Forever 21, Aéropostale, Sports Illustrated magazine зэрэг алдартай брендүүд ч багтжээ.

Тэгвэл компанийн захирал, үүсгэн байгуулагч Жэйми Солтер “Бид олон жилийн турш Reebok-ийг хараандаа аваад байсан юм. Эцэст нь энэ алдартай брендийг эгнээндээ нэгтгэх болсондоо баяртай байна. Бид Reebok-ийн бүрэн бүтэн байдал, шинэчлэлт, үнэ цэнийг хадгалж явах үүрэг хүлээсэн” гэдгийг хэлжээ.

Adidas брендийн хувьд энэ худалдаа нь компанийн орлого, зарлага, санхүүд ямар ч нөлөө үзүүлэхгүй бөгөөд Reebok-ийг зарсан дүн хувьцаа эзэмшигчдэд ногдох гэнэ.

Эх сурвалж: NY Post